PONTEVEDRA, CAPIZ – Nagpaathag ang isa sa mga miyembro sang Sangguniang Bayan sang Pontevedra kun ngaman nagapamatok sila sa P24 milyones nga pagautangon sang banwa sa bangko para ibakal sang mga dump truck.
Sa interview sang Bombo Radyo kay SB Member Erwin Borres, natingala gid sila kun ngaman P24 milyones ang utangon kag ginapaaprobahan kay ang canvass nila sa kantidad sang tatlo ka mga truck ang yara lang sa P10 milyones lang gani dapat amo lang sina nga kantidad ang dapat nila nga pagautangan.
Dugangan pa suno diri nga may ara sang existing nga utang ang munisipyo nga padayon pa nila ginabayaran.
Suno pa kay Borres nga kun tama ka urgent ang pagkinahanglan sang truck sa ila banwa mahino nila nga tandugon ang ila savings nga P13 Milyon nga bastante para ibakal sang amu nga mga unit kag wala na sila sang dugang nga utang nga pagabayaran.
Dugang pa ni Borres nga nakitaan man nila sang sobra nga presyo ang ila ginpresentar nga mga equipment nga dapat nga maklaruhan.
Luyag niya man diri maathagan ang pumuluyo parte sa mga balayaran sang banwa sa gasolinahan, catering service, mga job order nga wala ma swelduhan kag may mga utang man sa mga hardware.
Pagklaro ni Borres nga wala sila nagaköntra sa mga programa sang munisipyo apang luyag lang nila nga maathagan sila kag mag-agi lang sa insakto nga proseso.
