Nagapabilin sa gihapon sa P15 ang plete sa mga tricycle sa Roxas City bangud wala sang bag-o nga ordinansa.
Sa interview sang Bombo Radyo kay Roxas City Councilor Rey Magallanes, Chairman sang committee on transportation, iya ginpahayag nga indi basta-basta makadihon sang nasambit nga ordinansa bangud malawig kag madamu sang agyan nga proseso antes maaprubahan ang amo nga pagpasaka.
Suno kay Magallanes, nakighinun-anon na ang mga ini sa mga miyembro sang Tricycle Operators and Drivers Association, kag nagkasugot nga indi ang pagpasaka sang plete ang solusyon sa nagasaka nga presyo sang gatong kundi ang paghatag sa ila sang assistance.
Pahayag pa niya, indi niya mabasol ang pila ka mga tricycle driver nga nagapasaka sang plete bangud man sang asud-asud nga pagsaka sang gatong apang ini ang indi aprubado kag hugot nga ginadumilian.
Ginsiguro man sang natungdan nga maka-avail ang tanan nga mga rehistrado nga mga tricycle drivers sa Roxas City Tricycle Franchising Regulatory Unit sang nagakaigo nga bulig agud makapiyan-piyan sa ila ginapangatubang nga sitwasyon.
Nahibaluan nga P15 ang minimum fare para sa duha ka kilometro nga destinasyon kag P5 ang dugang sa succeeding per kilometer.
