ROXAS CITY – Nagpahanumdom ang hepe sang Roxas Component City Police Station (RCCPS) nga mangin alerto kag permi nga i-secure sang publiko ang ila mga panimalay matapos nga narekord ang serye sang kinawatay sa syudad sang Roxas.
Sa interview sang Bombo Radyo kay Police Lieutenant Colonel Francisco Paguia, ginsiling sini nga daku ang mabulig kun gina-secure ang mga panimalay ilabi na kun wala sang tawo ukon sa kagab-ihon agud indi madali nga masulod sang kawatan ukon akyat bahay.
Matandaan nga tatlo ka robbery incident ang nagluntad sa syudad sang nanligad nga semana kun sa diin ang suspek ang nadakpan pinaagi sa kuha sang CCTV.
Nagapati si Paguia, nga madamo pa sang nagalagaw sa syudad nga may malain nga tintuyo kag nagapangita lang sang tyempo agud makahimo sang krimen.
Gani, nagakadapat ang tagsa isa ang mangin alerto kag halongan ang mga propedad, e-save ang numero sang RCCPS agud madasig nga makapangayo sang responde kun may emerhensya.
Daku man nga bentaha , kun may yara sang CCTV kag ginahuptan nga ido agud makatuga sang gamo pananglitan magsulod ang indi kilala nga persona kag ma-alerto ang tag-iya sang panimalay.
Nakig-angut naman ini sa mga opisyales sa barangay, nga mas maayo kun nagaduty ang mga BPAT members agud mapahagan-hagan ang kinawatay nga nagakahinabo.
