Pormal na nga ginpasaka sang Office of the Ombudsman sa Sandiganbayan ang plunder case batuk kay Senator Rodante Marcoleta.
Personal nga nag-abot sa Sandiganbayan ang mga staff members gikan sa Ombudsman agud isumite ang reklamo, pila lang ka adlaw matapos ginkumpirmar sang ahensya nga magapadayon ini sa pagpasaka sang kaso batok sa senador.
Nahibaluan nga ang kaso naghalin sa mga alegasyon nahanungod sa indi nagakaigo nga pagbaton kag pagdeklarar sang campaign donation sa tion sang 2025 nga eleksyon kag ang plunder isa ka non-bailable offense kon mapag-on ang ebidensya.
Una na nga ginpanginwala ni Marcoleta ang mga alegasyon kag nagpanindugan nga may bahid sang pulitika ang kaso, samtang ginpahayag naman sang Ombudsman nga ginpaidalom sa maid-id nga imbestigasyon ang nasambit nga reklamo antes ginpasaka sa anti-graft court.
Ginalauman nga magapagwa pa sang dugang nga mandu ang Sandiganbayan angut sa pagproseso sang kaso batok sa senador.
