PILAR CAPIZ – Hugot nga ginpanginwala sang hepe sang Pilar Municipal Police Station nga si PMaj. Rachelle Garnica ang alegasyon nga ginahaboy batuk sa iya sang grupo ni Angelo Orence nga siya ang nagmando nga ipasara ang dalan sa Sitio Camarin, Barangay Cayus, Pilar Capiz.
Matandaan nga personal nga nagpadulong sa talatapan sang Bombo Radyo Roxas si Mr. Angelo Orence agud ipabalhag ang ginapahayag nga pagpamalabag sang dalan sang kapulisan sa ila lugar kabangdanan nga indi na ini maagyan sang truck nga nagakarga sang ila produkto nga tubo.
Sa interview sang Bombo Radyo kay Garnica, ginpahayag sini nga wala sang kamatuuran ang ginapanghambal sang tagreklamo bangud sa pagkamatuod suno diri nga ila ginpadulungan ang lugar bangud may yara sang nagluntad nga komosyon sa tunga sang grupo ni Orence kag pamilya Dela Torre.
Mahibaluan nga madugay na ini nga isyu sa tunga sang grupo sang mga mangunguma kag pamilya Dela Torre subong man ang iban pa nga pamilya nga naga-angkon bilang tenant sang duta.
Bangud sini, ginhangkat sang hepe si Orence nga magpakita sang ebidensya nga nagapamatuod siya ang nagmando nga magpasara sang amu nga dalan.
