Liwat nga nagpaandam ang Philippine National Police Anti Cybercrime Group (PNP-ACG) partikular sa mga magkahagugma nga ipabilin nga pribado ang mga sexual activity sini.
Ginpahayag ni PNP-ACG Spokesperson Lt. Wallen Arancillo ang amo nga paandam kasunod sang pagkadakop sa isa ka transgender woman nga nagpalapta sang mga hubad nga laragway kag video sang ex-boyfriend sini.
Suno kay Arancillo, base sa ila nga datos padayon ang pagtaas sang kaso sang krimen nga may kaangtanan sa pagkuha kag pagpalapta sang mga hubad nga laragway kag video.
May 238 na mga kaso ang may kaangtanan sa crime of photo and video voyeurism humalin Enero 1 tubtob Agosto 15, 2024.
Mas mataas ini ikumparar sa 209 nga nairekord sa kapareho nga tion sang nakaligad nga tuig.
Wala pa suno diri nakalakip sa mga namensyunar ang numero sang mga kaangay man nga reklamo sa iban nga law enforcemenrt agencies sang gobyerno.
Masami nga ginatunaan sang amo nga krimen suno sa PNP-ACG amo ang sobra nga pagpalanggaanay nga nagaresulta sa pagbayluhanay sang maselan nga mga laragway kag video nga kun sa diin kun magbulagay na ang mga ini, ginagambit ang amo nga mga butang bilang pang-blackmail ukon pagpamahog sa anay karelasyon.
