Nakahanda na ang Philippine National Police (PNP) sa paghatag sang seguridad sa pinakadako nga prusisyon kag pagtililipon sang mga Katoliko, ang Traslacion, sa Enero 9.
Suno kay Manila Police District spokesperson PMaj. Philip Ines, ginabanta 15,000 ka mga kapulisan ang iga-deploy sa tion sang Traslacion.
Magluwas ini sa mga tinawo sang PNP nga i-deploy sang iban pa nga ahensya sang gobyerno agud masiguro ang seguridad sang publiko kag mapabilin ang katawhay sa tunga sang ginalauman nga pagdagsa sang madamo nga mga deboto sa putukputukan sang kapistahan ni Poong Hesus Nazareno sa Quiapo.
Tubtob subong, wala pa sang may na-monitor nga seryoso nga pamahog ang kapulisan sa pagsaulog sang festival.
Liwat nga ginhatagan importansya sang Manila Police District ang mga ginadumilian nga dal-on sa prosesyon lakip na ang pagdala sang payong, kutsilyo ukon matalom nga butang, pagdala sang pusil, pagpalupok sang palupok kag pyrotechnic devices, breakable water containers subong man ang pagdumili sa pagsuksok sang hoodie jacket kag kalo santo sa nagaluntad nga ordinansa sang cordinancy.
Ginapanugyan man sa mga deboto nga magapasakop sa prusisyon nga kon indi malikawan nga magdala sang bag, dapat transparent ini, ginadumilian man ang mga manugbaligya sa sulod sang mga kontrolado nga lugar, hugot man nga ginadumilian ang pagkadto sa kahiwatan matapos makainom sang makahulubog nga ilimnon ukon hubog, kag kon mahimo, indi magdala sang mga kabataan ukon may mga balatian.
Ipatuman man ang no fly zone, drone zone kag sail zone sa sulod sang palibot sang Quirino Grandstand kag simbahan sang Quiapo.
