ROXAS CITY – Bukas ang Philippine National Police para sa imbestigasyon pananglita magpasaka sang kaso ang pamilya sang driver nga gin-aresto matapos nasal-an nga lider sang rebelde nga grupo sa Poblacion Tacas, Cuartero, Capiz.
Ini ang ginpahayag ni Police Col. Joem Malong, tagpamaba sang Police Regional Office 6 sang mainterview sang Bombo Radyo Roxas.
Suno kay Malong, ginarespeto sang hanay sang pulisya kun anuman ang mangin desisyon sang pamilya sang naaresto kag gilayon nga ginpahilway nga sui Baltazar Saldo, sang Barangay Sto. Angel, Dumalag, Capiz.
Apang nagpanindugan ini nga indi pa makabig sang PRO6 nga mistaken identity ang natabo nga pag-aresto sang Regional Intelligence Division kag Philippine Army 61st Infantry Battalion kay Saldo bangud may yara sila sang witness nga nagtudlo nga siya ang madugay na nga wanted nga si Virgilio Paragan ukon ‘alyas Hasan’ nga anay commanding officer sang Roger Mahinay Command, Komiteng Rehiyon – Negros sang Communist Party of the Philippines – New Peoples Army (CPP-NPA).
Kasunod sang pagkaaresto kay Saldo, suno kay Malong, nagakadapat lamang nga dalhon ini sa korte bangud ginahimo lamang sang hanay sang pulisya ang ila nga mandato.
Pananglitan mapamatud-an nga peke ang mga pahayag sang testito batuk kay Saldo, posible man ini pasakaan sang kaso nga perjury.
Nangin kontrobersiyal ang pagkaaresto kay Saldo matapos gilayon man ini nga ginpahilway kasunod sang pagpamatuod mismo sang pila ka mga indibidwal nga indi siya ang madugay na nga ginapangita nga kriminal nga nagapangatubang sang duha ka mga kaso nga murder kag duha man ka mga kaso nga attempted murder.
