ROXAS CITY – Hugot nga ginapatuman sang mga kapulisan ang paglibot sa mga sementeryo sa probinsya sang Capiz.
Sa interview sang Bombo Radyo sa Provincial Director sang Capiz PPO nga si PCOL Albert Tapulao, ginpahayag sini nga masobra 200 nga mga kapulisan ang ila gindeploy sa 53 tanan ka mga sementeryo sa probinsya.
Suno kay Tapulao, antes magbiya sa puluy-an kinahngaln nga nakaplano kung anu oras magapadulong sa sementeryo, siguraduhon nga nakasarado ang mga bintana kag naka-lock ang pwertahan sang puluy-an, tipunon ang tanan nga mga importante nga gamit sa sulod sang balay, indi pagpabay-an ang mga kandila nga nakasinde mga appliances nga nakasaksak kag gas stove subong man ang gripo kag ibilin sa masaligan nga kaingod ang puluy-an.
Pag-abot naman sa sulod sang sementeryo, magdala sang proteksyon sa init kag ulan, siguraduhon nga ang nagasiga nga kandila indi matumba agud magtuga sang sunog, magdala sang bastante nga pagkaon kag tubig nga imun, likawan nga magdala sang mga ginadumilian nga butang kag hibaluon ang lokasyon sang mga first aid station kag PNP Assistance Desk.
Pila lamang ini sa mga kinahanglan tandaan agud mangin matalunsay ang Undas 2024.
