MANILA, Philippines – Narekober na sang Philippine National Police ukon PNP ang closed-circuit television ukon CCTV footage sa lugar sang insidente kun sa diin nagkalumos ang duha ka manugdula sang Ateneo de Manila University sa isa ka beach resort sa Dipaculao, Aurora.
Ang mga biktima amo sanday Rene Baterbonia, 19 anyos kag bag-o lang nakadula sa finals sang Palarong Pambansa kag nakakomit sa Blue Eagles program, kag Divine Adili, 21 anyos nga Nigerian student-athlete nga nagdula sa UAAP Season 88 men’s basketball tournament sang nagligad nga tuig.
Suno sa PNP, nagakatapo ang duha ka atleta sa isa ka teambuilding activity sang ila team sang Lunes sang hapon sang gin-anod sila sang mabaskog nga current sa dagat.
Ginpahayag ni Aurora Police Provincial Director Col. Percival Pineda nga narekober ang duha ka atleta malapit sa baybayon mga 30 tubtob 40 minutos pagkatapos sang insidente.
Antes sini, nagmandu si PNP Chief Gen. Nicolas Torre III sang mas madalom nga imbestigasyon agud mahibaluan ang kabug-usan sang natabo kag ginpasiguro nga wala sang matabo nga pagtabon ukon cover-up sa kaso.
Nagalaum ang mga otoridad nga makabulig ang narekober nga CCTV footage sa paghatag sang mas klaro nga hulagway sang mga hitabo antes kag durante sang insidente.
Nagpagwa man sang pahayag ang Ateneo de Manila University nga nagapadangat sang ila pagpakig-unong kag suporta sa mga pamilya sang duha ka atleta.
