Ginmando ni Philippine National Police (PNP) Chief PGen Jose Melencio Nartatez Jr. ang gilayon nga imbestigasyon kag paglagas sa mga suspetsado sa likod sang kamatayon sang lima ka pulis sa Maguindanao del Sur.
Suno kay Nartatez, hugot nila nga ginapakamalaot ang ini nga pag-atake kag ginpahayag nga indi mag-untat ang kapulisan sa pagpangita sa mga suspek kag nagpasalig nga atubangon kag pasabton sila sa kasuguan.
Sa subong, magluwas sa lima nga napatay sa nagluntad nga ambush, may yara man sang tatlo ka pilason sa insidente nga handa nga suportahan sang PNP agud masiguro ang ila gilayon nga pag-ayo.
Gilayon naman nga nagpalab-ot ang hepe sang iya pagpakig-unong sa pamilya sang mga napatay nga pulis kag ginmintinar nga kun kinahanglanon nga mag-assign sang dugang nga pwersa gikan sa mga elite units, himuon lamang nila ini agud madakpan ang mga personalidad sa likod sang engkwentro.
Samtang ginpasalig naman sang natungdan nga apisar sini, padayon nga maisog nga tumanon sang kapulisan ang ila mandato sa paghatag sang proteksyon kag seguridad sa mga pumuluyo kag kag komunidad.
