Nagmando si Philippine National Police (PNP) Chief PGen. Jose Melencio Nartatez Jr sang independent investigation may kaangtanan sa alegasyon nga nag-escort ang local police officers sa itom nga van nga ginaalegar sakay si Senator Ronald dela Rosa paguwa sa compound sang Senado sang Mayo 14.
Suno sa PNP, ang mga imbestigador ang gintugyanan sa pag-usisa sang nagkalain-lain nga mga ebidensya lakip na ang mga logbook, CCTV footage, radio dispatch, deployment logs, kag body camera footage agud mahibaluan kon may natabo nga indi otorisado nga bulig halin sa kapulisan.
Tinutuyo sang imbestigasyon nga ma-verify kun may yara sang paglapas sa nagaluntad nga mga pagsulundan kag kon may mga personnel nga naggamit sang police powers ukon kagamitan nga wala sang nagakaigo nga pahanugot.
Sa subong, wala pa sang may ginpagwa nga opisyal nga resulta ang PNP angut sa insidente bangud padayon ang maid-id nga imbestigasyon.
