Nag-issue na sang subpoena ang Philippine National Police – Criminal Investigation and Detection Group (CIDG) kay Senator Ronald “Bato” Dela Rosa may kaangtanan sa ginaalegar extrajudicial killings (EJK).
Base sa dokumento nga napetsahan Mayo 10, si Dela Rosa ang ginamanduan nga magpakita sa CIDG sa Camp Crame sa Quezon City sa Huwebes, ‘las 10 sa aga.
Ini kasunod sang mga reports nga nag-issue ang International Criminal Court sang arrest warrant batuk sa Senador nga sa ulihe gin-athag sang ICC nga wala ini sang kamatuoran.
Una nga nag-anunsyo sang pag-release sang subpoena batuk kay Dela Rosa amo si Department of the Interior and Local Government (DILG) Sec. Jonvic Remulla.
Gin-athag man niya nga ang imbestigasyon sang CIDG ang indi konektado sa gin-report nga arrest warrant batuk kay Dela Rosa.
Samtang, ginserbe man sang PNP-CIDG ang kopya sang subpoena sa opisina sang senador.
Ginaalegar ginbaton sang staff sang senador ang dokumento apang wala ini ginpirmahan.
Magluwas sa Senado, ginserbehan man sang PNP-CIDG sang kopya sang subpoena ang puluy-an ni Dela Rosa sa Davao.
