May impormasyon na ang Philippine National Police – Criminal Investigation and Detection Group kun sa diin nagpadulong ang salakyan ni Senator Robin Padilla nga ginsakyan man ni Senator Ronald dela Rosa pagguwa nila sa Senado sang kaagahon sang Mayo 14.
Sang ginpamangkot kun diin nagdiretso ang salakyan sang senador, nagpahayag lamang si Robert Alexander Morico II nga kabalo sila kun diin ini nagkadto, apang indi anay sila maghatag sang dugang nga detalye samtang nagapadayon ang imbestigasyon.
Gintugyan naman sang CIDG kay Jose Melencio Nartatez Jr. ang pagkomento may kaangtanan sa warrant of arrest sang International Criminal Court batok kay Dela Rosa.
Amu naman ini ang sabat ni Morico sang ginpamangkot siya kun nabaton na sang grupo ang warrant of arrest.
Ginpasiguro man ni Morico nga sundon sang CIDG ang ano man nga direktiba nga ipaguwa sang hepe sang PNP.
Sa subong, nakatutok ang CIDG sa imbestigasyon sang natabo nga pagpangluthang sa guwa sang Senado.
Una na nga ginpabutyag sang PNP sa isa ka briefing sa Malacañang nga nakita sa CCTV footage ang paghalin sang duha ka senador gamit ang salakyan ni Padilla.
Natabo ini pila ka oras pagkatapos sang bayluhanay sang lupok sa tunga sang mga katapo sang Office of the Sergeant-at-Arms kag National Bureau of Investigation.
