Aminado ang Philippine National Police (PNP) nga may pila sila ka mga tinawo nga naadik sa e-games.
Sa hearing sang Senado angut sa mga online games, gin-usisa ni Senate Committee on Ways and Means Chairman Sherwin Gatchalian ang mga PNP personnel na nalubong sa utang bangud sa illegal gambling sang e-games kag mangin sang e-sabong.
Suno kay PBGen. Raul Tataca, may mga tinawo sila nga naulamid sa mga nasambit nga aktibidad nga gilayon nila nga ginpasakaan sang kaso nga administratibo.
Madamo suno diri sang pulis ang na-dismiss na sa serbisyo samtang ang iban ongoing pa ang imbestigasyon sa kaso.
Magluwas sini, nagpatigayon man ang PNP sang spot inspection kun sa diin ginalantaw pati ang unod sang cellphone kag kun nakit-an nga may mga applications sang e-games, gilayon nga ginapaidalom sa imbestigasyon ang pulis.
Una na nga ginpahayag sang PNP nga ginasuportahan nila ang mga hagna nga naka-file sa Senado natuhoy sa dalayon nga pag-ban sang online gaming kag POGO sa pungsod.
