ROXAS CITY – Gina-imbestigahan na sang pulisya ang viral nga ‘sparring’ sang 2 lalaki sa isa ka bakante nga lote sa Sitio Nasagud, Barangay Lanot, Roxas City nga nangin viral.
Ini ang ginpahayag ni Police Lt. Col. Ricardo Jomuad, Jr., ang hepe sang Roxas City PNP sang mainterview sang Bombo Radyo Roxas.
Suno kay Jomuad, natumod na nila ang duha ka mga lalaki nga nakuhaan nga nagabayluhanay sang sipa kag inumol nga sanday Ruther John Mestidio, 20 anyos sang Barangay Sibaguan, Roxas City kag Leonard Brian Torrenueva, 19 anyos sang Barangay Poblacion, Norte, Ivisan.
Sa inisyal nga imbestigasyon sang pulisya, nahibaluan nga may yara na sang daan nga hiligut-anon ang antes pa man ginkasa ang ila nga sambuwa sang makapauli na sa Pilipinas si Torrenueva gikan sa Amerika.
Pagapasakaan ang duha sang panumbungon nga paglapas sa ginapatuman nga inter-agency task force (IATF) guidelines kag curfew hour sa mga may edad 20 anyos panubo.
Apisar wala nakuhaan sa video ang aktwal nga tay-anay sa nasambit nga ‘sparring’, magapatigayon sang mas maid-id nga imbestigasyon ang pulisya bangud kun mapamatud-an nga ginpustaan ini, magapangatubang man sa nagakaigo nga panumbungon ang mas o menus 80 ka mga indibidwal nga nakuhaan sa nasambit nga video.
