Ginkahangawa sang Philippine National Police (PNP) ang padayon nga pagbaligya sang mga lapsag sa social media, sa pihak sang lapnagon nga kampanya batuk sa human trafficking.
Base sa monitoring sang PNP Women and Children Protection Center (WCPC), pila ka mga lapsag ang nasalbar sa serye sang anti-trafficking operations sang una nga semana sang Pebrero.
Suno kay PNP Chief Gen. Jose Melencio Nartatez Jr., makahangawa ang pagdamo sang mga Pilipino nga nagabakal sa amo nga baligyaanay, sa diin may pila ka mga lapsag ang ginabaligya sa balor nga P10,000 kada isa.
Ginabantayan man sang PNP ang posible nga pagpanghilabot sang international drug syndicate nga ginapatihan konektado man sa human trafficking, magluwas sa mga local groups nga una na nga ginamonitor.
Nahibaluan nga gin-activate na man sang PNP ang pila ka mga special units agud buligan ang pagdakop sa nasambit nga mga grupo.
