Ginkondena sang Philippine National Police (PNP) ang ginatawag sini nga “senseless and cowardly ambush” sa ila mga tropa sa Shariff Aguak, Maguindanao del Sur sang gab-i sang Marso 28, 2026 nga nagpatay sa lima (5) ka mga pulis kag nagpilas sa tatlo ka iban pa.
Suno sa pahayag, ginsalakay sang wala makilala nga armado nga mga suspetsado ang mga katapo sang 2nd Provincial Mobile Force Company samtang pabalik na sa ila detachment matapos magpatigayon sang patrol kag police visibility operations.
Gilayon naman nga gindala sa mga malapit nga ospital ang mga pilason nga personnel kag padayon nga ginabulong.
Suno kay PNP chief Jose Melencio Nartatez Jr., naglunsyar sang intensified hot pursuit operations ang ahensya kaupod ang Armed Forces of the Philippines agud matumod kag madakpan ang mga indibidwal nga responsable.
Ginpasalig naman sang PNP nga ginahimo nila ang tanan nga tikang agud maangkon ang hustisya para sa pamilya sang mga biktima.
Nagpalab-ot man sang pagpakig-unong ang kapulisan sa pamilya sang mga napatay, nga ginlaragway bilang mga indibidwal nga nagpakita sang kaisog kag dedikasyon sa ila katungdanan.
“We will not waver. This attack will not go unanswered. Justice will be swift, certain, and uncompromising” suno kay Nartatez sa isa ka pahayag.
Padayon pa ang operasyon sa lugar samtang ginapabaskog naman ang seguridad sa Shariff Aguak kag mga malapit nga komunidad.
