Ginpasalig sang Philippine National Police (PNP) nga handa ang ila mga tinawo kag kagamitan sa paghatag sang seguridad para sa ika-49 nga ASEAN Summit kag Related Summits nga pagahiwaton subong nga Nobyembre 2026.
Sa Ceremonial Send-Off of Force and Resources sa Quirino Grandstand, Rizal Park sa Manila sang Nobyembre 11, ginpakita sang PNP, National Capital Region Police Office (NCRPO) kag iban pa nga partner agencies ang ila kahandaan sa nasambit nga international gathering.
Nagtambong sa aktibidad sanday Department of the Interior and Local Government (DILG) Secretary Juanito Victor C. Remulla kag PNP Chief General Jose Melencio C. Nartatez Jr.
Sa pagpanguna ni NCRPO Acting Regional Director Police Brigadier General Christopher N. Abrahano, handa na ang mga tikang kaangay sang pagpabaskog sang police visibility, pagmonitor sang mga lugar kag ruta nga pagaagyan sang mga delegado, intelligence monitoring kag madasig nga pagresponde sa anuman nga emerhensya.
Ginpasalig man sang NCRPO nga magapadayon ang regular nga pagpatrolya kag safety operations sa nagkalain-lain nga komunidad sa Metro Manila.
Tuyo sang PNP kag mga kaupod nga ahensya nga mapasiguro ang luwas, maayo kag matawhay nga paghiwat sang ASEAN Summit 2026 samtang ginaamligan ang kaluwasan sang publiko.
