Ginpasiguro sang Philippine National Police (PNP) nga handa ang ila puwersa para sa seguridad sang mga estudyante, manunudlo, kag mga ginikanan sa nagahilapit nga pagbukas sang klase sa Hunyo 8 sa mga pampubliko kag pribado nga eskwelahan sa bug-os nga pungsod.
Suno kay PNP chief PGen. Jose Melencio Nartatez Jr., bastante ang ila mga tinawo agud maghatag sabat sa mga kinahanglanon sa seguridad para sa balik-eskwela, bisan pa sa ginapaabot nga pagdugok sang mga estudyante sa mga eskwelahan.
Sa idalom sang ila security plan, magatutok ang PNP sa presensya sang mga pulis sa mga eskwelahan kag sa mga mayor nga dalan agud masiguro ang kaluwasan sang publiko, labi na sang kabataan.
Ang pahayag ginpaguwa sa tunga sang mas ginpabakod nga operasyon sang mga otoridad may kaangtanan sa nagkalain-lain nga high-profile nga mga kaso sa pungsod.
Ginpabutyag pa sang PNP nga padayon nila nga ginapatuman ang ila mandato sa pagmintinar sang katawhay kag kalinong samtang ginapreparar man ang mga tikang para sa luwas nga pagbukas sang klase.
Wala naman sang iban nga detalye nga ginpaguwa ang PNP parte sa specific nga deployment sang mga personnel, apang ginpahayag sang ahensya nga nakahanda na ang ila security preparations para sa bug-os nga pungsod.
