-- ADVERTISEMENT --

Nagpahayag sang kahandaan ang Philippine National Police (PNP) nga magbulig sa posible nga extradition ukon pagbalhin kay Kingdom of Jesus Christ (KOJC) leader Pastor Apollo Quiboloy sa United States.

Suno kay Police Brigadier General Allen Rae Co, hepe sang Public Information Office (PIO) sang PNP, kon may yara na sang mando halin sa korte nga buligan ang pagbalhin kay Quiboloy kag siguruhon ang iya seguridad pakadto sa airport, tumanon ini sang kapulisan.

Nabatian nga nagpagwa na sang extradition arrest warrant kag hold-departure order ang Makati Regional Trial Court batok kay Quiboloy kag sa duha pa niya ka kaupod nga akusado.

May kaangtanan ini sa mga kaso nga international human trafficking, sex trafficking, conspiracy kag bulk cash smuggling nga ginapangatubang sang mga akusado sa Estados Unidos.

Samtang, una na nga nagpahayag ang National Bureau of Investigation (NBI) sang ila kahandaan nga magbulig sa mga otoridad kon madayon ang pagbalhin kay Quiboloy sa Estados Unidos.

-- ADVERTISEMENT --