ROXAS CITY – Gilayon nga ginhilway sang mga otoridad ang isa ka fish vendor nga nadakpan sa ginkasa nga drug buybust operation sang Dumalag Municipal Police Station kag Philippine Drug Enforcement Agency (PDEA) sa Barangay Santo Angel, Dumalag Capiz.
Ini ang kasunod sang pagkadiskubre nga indi sang shabu ang narekober sa naaresto nga si Nelson Nicolas, 22 anyos, kag posible tawas lamang ukon ginpudpod nga dulsi.
Sa interview sang Bombo Radyo Roxas kay Police Senior Inspector Pedro Goldino Diocson, hepe sang Dumalag PNP, ginpahayag sini nga matapos ginpaidalom sa eksaminasyon ang nakuha nga tatlo ka sachets sang ginapahayag shabu kay Nicolas, nagguha sa resulta nga negatibo ini sa methamphetamine hydrochloride.
Apang nagpanindugan si Diocson na matunog ang pangalan ni Nicolas nga nagaduso sang ilegal nga droga kag ila man ini ginpaidalom sa surveillance kag validation.
Posible suno sa iya nga tawas ukon ginpudpod nga dulsi ang unod sang sachets nga isa sa mga estratehiya ni Nicolas sa pagpanunto sa iya mga ka-transaksiyon.
