MANILA, Philippines – Ginkumpirmar sang Philippine National Police “PNP”, nga nagsurender ang kampo ni Senator Ronald ” Bato” dela Rosa sang 20 ka armas sa otoridad.
Sa pahayag sang PNP sang Lunes, ginkoordinar ang pagsurender sang armas pinaagi sa awtorisado nga legal representative sang senador sa Barangay Maa, Davao City.
Samtang wala naman ginpahayag sang kapulisan ang ngalan sang nasambit nga representante.
Madumduman nga sang Mayo, ginbawi sang Firearms and Explosives Office “FEO”, sang PNP ang lisensya ni Dela Rosa sa pagpanag-iya kag pagdala sang armas, lakip na ang rehistro sang iya 117 ka pusil, kasunod sang mga tikang para sa iya pag-aresto may kaangtanan sa warrant nga ginpagwa sang International Criminal Court.
Sa karon nahibaluan nga ginapangita sang ICC si Sen. dela Rosa, bangud sang iya pagkalakip sa kampanya kontra iligal nga droga sang anay Presidente Rodrigo Duterte, kun sa diin suno sa human rights groups, nagresulta ini sa kamatayon sang yara sa 30,000 ka tawo sa bug-os nga pungsod.
