Ginsiling ni Philippine National Police (PNP) PIO Chief spokesperson PBGen. Jean Fajardo nga yara sa 18,802 ang ila igapalapta nga mga kapulisan sa mga sementeryo kag transport bilang pagpreparar sa nagahilapit nga Undas.
Suno kay Fajardo, ang kinalain lamang sa ila pagpreparar subong bangud may mga nagapadayon pa nga nagabangon matapos ang pagpanglaslas sang Bagyong Kristine.
Bangud sini, may mga igapadala man ang PNP nga augmentation ukon dugang nga pwersa sang kapulisan sa Bicol region bangud sa nagapadayon nga retrieval operations.
Direktiba man suno diri ni PNP Chief PGen. Rommel Francisco Marbil nga i-mobilize ang reserved force agud ang mga kapulisan sa Region 5 partikular na ang mga apektado may yara sa oras nga makaupod ang ila tagsa ka mga pamilya.
Kadungan sini, may posibilidad man suno diri nga ma-extend ang pagpabilin sang mga augmented personnel sa bicol, tubtob matapos ang Undas.
Samtang, nagpaandam naman ang otoridad sa mga magapauli sa ila tagsa ka mga probinsya nga siguraduhon nga nakasarado ukon nakakandado ang mga puwertahan sang mga balay kag bintana agud indi makawatan.
Dako nga butang man suno diri ang pagpahamtang sang CCTV kung masarangan sang budget.
