Nagpaandam ang Philippine National Police (PNP) sa tanan nga personnel sini nga mangin responsable sa pagtipig sang ila mga pusil, labi na kon wala sila sa duty kag yara sa ila mga puluy-an.
Suno kay PNP chief Gen. Jose Melencio Nartatez Jr., kinahanglan siguruhon nga yara sa luwas nga lugar ang mga pusil kag indi ini maabot sang mga bata ukon iban pa nga tawo.
Ginhimo ini nga pahibalo kasunod sang duha ka separado nga insidente sang pagpangluthang sa mga eskwelahan sa sulod lamang sang halos duha ka bulan.
Sang Hunyo, tatlo ka estudyante ang napatay sa isa ka school shooting sa Tacloban City. Kag sini nga semana, duha ka estudyante, lakip ang ginapatihan nga gunman, ang napatay sa insidente sa Ateneo de Zamboanga University.
Sa duha ka insidente, ginasuspetsahan nga gin-gamit sang mga menor de edad ang service-issued firearms nga ginkuha halin sa ila mga paryente ukon ginikanan.
Ginmandoan man sang PNP ang mga police commander nga regular nga magpahanumdom parte sa husto nga pagtipig sang armas kag sa responsibilidad sang mga personnel sa kada unit briefing kag formation.
Samtang, ginpahayag sang PNP chief nga magahatag ang PNP sang mga personnel kag kagamitan para sa nationwide school safety drills sang Department of Education nga natalana sa Agosto 25.
