Nagpahanumdom ang Philippine National Police (PNP) sa ila mga tinawo nga mangin responsable sa pagtago sang ila mga armas luthang, ilabi na kun wala sa trabaho kag yara sa ila balay.
Suno kay PNP chief Gen. Jose Melencio Nartatez Jr., kinahanglan nga siguraduhon nga safe ang ila mga armas luthang kag indi malab-ot sang mga kabataan ukon iban pa.
Kasunod ini sang duha ka separado nga insidente sang pagpangluthang sa eskwelahan sa sulod lamang sang mga duha ka bulan.
Ginmanduan man sang PNP ang mga police commander nga regular nga pahanumdumon angut sa nagakaigo nga kaluwasan kag responsibilidad sa tion sang mga unit briefing kag formation.
Samtang, ginpahayag sang hepe sang PNP nga magahatag sang personnel kag kagamitan ang PNP para sa nationwide school safety drills sang Department of Education nga natalana sa Agosto 25.
