Nagpatigayon sang monitoring ang mga kapulisan sa pila ka mga gasolinahan sa Roxas City, Capiz.
Ini matapos nga nakalab-ot ang report kay Energy Sec. Sharon Garin nga nagpatuman sang indi aprubado nga price increase sa mga produktong petrolyo nga oil companies sandig sa oil price monitoring sang Bombo Radyo Roxas.
Ang Bombo News Team sang Bombo Radyo Roxas naglibot sa mga gasoline stations sa pagtsekyar sa mga presyo sang gatong rason nga na-monitor ang paghulag sang mga presyo apisar nga indi pa epektibo ang price hike.
Base sa report, personal nga nagkadto si PLTCOL Donnel P. Regis, OIC sang Roxas Component City Police Station sa gasolinahan sang Petron sa Brgy. Lawaan sa diin nakig-istorya ini sa tag-iya kag tagdumalahan sang establisyemento.
Ginpaathag man sang tagdumalahan nga nagpatuman sila sang ₱0.50 nga dugang sa presyo sang ila mga produktong petrolyo halin Marso 4 tubtob Marso 9.
Ginpanugyanan sila sang kapulisan nga hugot nga sundon ang mga pagsulundan sang Department of Energy sa pagpatuman sang price adjustments.
Samtang, nag-coordinate man ang kapulisan sa Caltex Gasoline Station sa KM 1, Brgy. XI, Roxas City sa diin naglab-ot sa masobra ₱80 ang presyo sang gatong sang na-monitor ini kaina sang aga sang Bombo Radyo Roxas.
Suno sa tagdumalahan sang gasolinahan, ang presyo sang ila mga produktong petrolyo ang base sa direktiba sang Chevron Corporation.
Apang matapos nga nagpakig-angot ang PNP sa ila mga branch sa Roxas kag Kalibo, nagdesisyon ang operations manager sang Mardigold Aklan-Capiz Inc. nga ibalik ang nauna nga presyo sang diesel kag platinum nga yara lang sa masobra ₱60 bilang human consideration.
Padayon man ang pagmonitor sang mga kapulisan sa mga gasolinahan sa syudad agud masiguro nga wala sang hoarding kag illegal price increases sa tunga sang pagsaka sang presyo sang petrolyo.
