Naka-full alert status na ang Philippine National Police (PNP) sa Bangsamoro Autonomous Region in Muslim Mindanao (BARMM) kag mga kaiping nga rehiyon para sa patigayunon nga labing-una nga regular parliamentary elections subong nga adlaw.
Suno kay PNP Chief Police General Jose Melencio Nartatez Jr., nakahanda ang tanan nga police units agud masiguro ang luwas, matawhay kag masaligan nga eleksyon sa rehiyon.
Ginabulubanta nga 10,500 ka mga pulis ang gin-deploy para sa election duties, lakip ang halos 4,900 ka mga tinawo gikan sa Police Regional Office Bangsamoro Autonomous Region ukon PRO-BAR kag 5,600 ka mga augmentation forces gikan sa nagkalain-lain nga regional offices kag specialized units.
Ginmanduan ang mga security forces nga bantayan ang mga opisina sang Commission on Elections, voting centers, checkpoints kag iban pa nga kritikal nga lugar agud malikawan ang anuman nga insidente sa eleksyon.
Padayon nga gina-monitor sang mga otoridad ang 93 sa 105 ka mga banwa kag syudad sa BARMM nga ginkategorya nga areas of concern bangud sa posible nga mga insidente nga may kaangtanan sa eleksyon, intense political conflict ukon mga pamahog gikan sa mga armado nga grupo.
Suno sa Comelec, ginalauman nga masobra 2.4 million ka mga rehistrado nga botante ang
magaboto agud magpili sang mga miyembro nga 80 ka katapo sang Bangsamoro Parliament.
