Natalana nga maghatag sang bulig ang Philippine National Police (PNP) sa Independent Commission for Infrastructure (ICI) agud nga ma-inspeksyon ang masobra 421 ka natumod nga ghost flood control projects sa pungsod.
Sa isa ka press briefing, ginkumpirmar ni PNP Spokesperson kag Public Information Office Chief PBGen Randulf Tuaño nga pila ka PNP units kaangay sang Engineering Services (ES), Criminal Investigation and Detection Group (CIDG), Forensic Group (FG) kag Information and Technology Management Services (ITMS) ang may kahilabtanan sa pag-imbestigar sang amo nga mga proyekto.
Suno sa iya, gintalakay man sa sinapol ang enhanced information sharing kag systems integration sa tunga sang ICI kag PNP.
Nagatuyo man ini nga mahibaluan ang mga lokasyon sang mga ghost project paagi sa pagpasangkad sang ila hanay sa technical kag investigative support sang ICI.
Ang mga yunit may kaugalingon nga mga katuyuan, pareho sang pagkilala sang mga teknikal nga dokumento, orensic investigation and validation, kag iban pa nga sahi sang technical support.
Samtang, apisar nga ginpahibalo na ang mga units sa ila tagsa ka papel sa pag-imbestigar sa sini nga mga ghost projects, wala pa sang numero ukon datus nga ginpagwa kun pila ka mga police officers ang i-assign sa pag-verify sang nasambit nga mga proyekto.
Sa pihak sini, ginpasalig sang National Police nga naga-isa sila sa ICI agud mapadasig ang imbestigasyon kag verification sang mga proyekto para sa prosecution sang mga kaso angut diri.
