Padayunon sang Philippine National Police (PNP) ang ila fact-finding review may kaangtanan sa extra-judicial killings ukon EJK kag iban pa nga may kaangtanan nga mga insidente.
Ini matapos ginmandu ni Department of the Interior and Local Government (DILG) Secretary Jonvic Remulla sa PNP sa pagpanguna ni PNP Chief General Jose Melencio Nartatez Jr. nga ipadayon ang imbestigasyon sa mga report kag nareklamo nga EJK-related incidents sa nagligad nga police operations, lakip na sang tion nga Davao City Police Director pa si Senador Ronald “Bato” Dela Rosa.
Suno kay Nartatez, ibase sang PNP ang ila imbestigasyon sa mga ebidensiya kag existing case materials kag reports nga gin-submit sang nagkalain-lain nga police units kag oversight bodies.
Ginkumpirmar man sang PNP Chief nga gintugyan sa Criminal Investigation and Detection Group ukon CIDG ang pagpanguna sa imbestigasyon kag pag-isyu sang subpoenas sa mga indibidwal nga nalakip sa case records bilang kabahin sang standard fact-finding procedures.
Ginpaathag naman sang PNP nga ang subpoenas indi arrest warrants kundi legal nga instrumento agud makakuha sang impormasyon kag mapatin-aw pa ang ila findings.
Ginsiguro man sang mga opisyal nga patas kag wala sang bias ang pagpatigayon sang proseso.
Dugang pa ni Nartatez, posible nga imbitahon ang mga indibidwal nga nalakip sa nagligad nga reports, lakip na si anay PNP Chief kag senador nga si Bato Dela Rosa, agud maghatag sang impormasyon.
Suno sa PNP, ang review nagatinguha nga sabton ang madugay na nga mga pamangkot may kaangtanan sa nagligad nga police operations kag mapabakod pa ang institutional accountability sang kapulisan.
