PONTEVEDRA, CAPIZ – Ginsaysay ni Police Captain Mark Anthony Garcia, hepe sang Pontevedra Municipal Police Station, ang natabo antes ang pagluthang-patay kay Police Captain Rian Ampoyos, myembro sang First Capiz Provincial Mobile Force Company, sa Barangay Binuntucan, Pontevedra, Capiz.
Sa interview sang Bombo Radyo kay Capt. Garcia, iya ginpahayag nga nagpadulong si Ampoyos upod ang duha ka mga pulis sa isa ka videoke bar kag nakig-istorya sa tag-iya nahanungod sa peace and order sa lugar.
Samtang nagapungko ang mga kapulisan sa sulod sang videoke bar, may yara sang komusyon nga natabo sa likod sang ila lamesa.
Nagpangayo sang bulig ang tag-iya kay Ampoyos kag gintinguhaan nga pakalmahon kuntani ang sitwasyon.
Apang sa baylo nga magkalma, hinali na lang nga nagbunot sang armas ang suspek nga si William Deocampo kag ginluthang si Ampoyos.
Isa ka igo sang bala sa nawala nga dughan ang naangkon sang pulis nga nangin resulta sang iya kamatayon.
Suno kay Garcia, ang isa ka upod nga pulis ni Ampoyos ang nagbulig sa iya samtang ang isa naman ang yara sa saguwa sang videoke bar sang natabo ang krimen.
Sang nahibaloan sini nga natirohan si Ampoyos, nakaguwa na ang gunman nga wala niya mamulalongan apang nagkuha ini sang iya service firearm sa iya salakyan kag may nakit-an nga lalaki nga posible isa sa mga suspek nga nagakasa sang armas kag didto nga gintiro niya ini kag naigo apang nakapalagyo.
Ang una nga naguwa nga suspek nga amo ang gunman ang natigayon nga mapugos sang tag-iya kag mga tinawo sini sa bar rason nga nadakpan ini apang yara sa ospital bangud ginaalegar nga ginsaputi.
