ROXAS CITY-Ginpaidalom sa administrative relieve si Police Captain Alcer Monsera matapos nga nadalahig ini sa natabo nga pagbungguanay sang ambulansya sang Sigma Disaster Risk Reduction and Management Office kag Montero Sports sa National Highway sang Barangay Ondoy, Ivisan Capiz.
Ini ang ginkompirmar ni Police Colonel Julio Gustilo Jr. Provincial Director sang Capiz Police Provincial Office sang mainterview sang Bombo Radyo.
Ginpahayag ni Gustilo nga gilayon nga ginpaidalom sa Administrative Relieve si Monsera kag gilayon man nga gintal-usan bilang hepe sang Dumalag Municipal Police Station makaligad nga nabaton sini ang impormasyon nga imbolbado si Monsera sa insidente.
Suno sa kay Gustilo nga sa tion nga makaguha na sa opsital si Monsera, indi pa ini makabalik bilang hepe sang nasambit nga police station kag temporaryo ini nga igapahamtang sa Provincial Holding and Accounting Unit sang CPPO samtang wala pa naguwa ang resulta sang imbestigasyon.
Ginpasalig ni Gustilo nga paga-usisaon sini kun ngaa wala sa area of responsibility si Monsera sang tion nga natabo ang insidente kaupod ang iban nga mga indibidwal nga indi miyembro sang mga kapulisan.
Samtang ginkompirmar ni Gustilo nga bangud may yara sang ginbawian sang kabuhi, pagapasakaan sang nakaigo nga panumbongon si Monsera.
Sa karon nagapabilin sa ospital si Monsera matapos nga nakaangkon sang pilas sa magkatuhay nga porsyon sang kalawasan sa natabo nga insidente
