ROXAS CITY – Nagpasalig ang pamunuan sang Capiz Police Provincial Office (CPPO) nga ila tinguhaan nga mapasaka ang dugang nga panumbungon batuk sa 73-anyos nga anay alkalde sang President Roxas nga si Ramon Consing Locsin.
Ginpahayag ni Police Col. Canilo Fuentes, provincial director sang CPPO nga una nga ginpasaka nga panumbungon sang kapulisan batuk kay Locsin amo ang Alarm and Scandal kasunod sang impormasyon nga nabaton gikan sa concerned citizen nga nagpinalupok ukon nag-firing ang anay alkalde sa Resources Services Livelihood (RSL) Center sa Barangay Cabug Cabug, sang amo nga barangay.
Aminado si Fuentes nga makabig nga summary proceeding in nature ang una nga complaint nga Alarm and Scandal nga ginpasaka kay Locsin kag indi na kinahanglan nga mapaidalum sa inquest proceeding subongman indi na kinahanglan nga magbayad sang pyansa rason nga pagkahapon nakaguwa si Locsin matapos nga nagpapanaug sang released order ang provincial prosecutor’s office.
Apang ginpasiguro sang opisyal nga madugangan ang panumbungon nga ginapangatubang sang anay alkalde bangud ila tingwaan nga mapasakaan ini sang panumbungon angut sa nakumpiskar nga armas kag ang reklamo sang pila ka mga indibidwal nga pagpamahog sini kag pwersahan nga pagsulod sa RSL center.
