ROXAS CITY – Mas hugot nga border control checkpoint ang ginapatuman sa karon sang mga frontliners sa mga boundaries sang probinsiya agud masiguro nga wala sang makalusot matapos nga nagtakup na ang ginhatag nga plaso para sa mga luyag magpauli kasunod sang ginpatuman nga general community quarantine sa Capiz.
Ginpahayag ni Police Col. Julio Gustilo Jr., provincial director sang Capiz Police Provincial Office, istrikto ang kapulisan sa pag-implementar sa Executive Order nga gin-isyu sang gobernador agud wala sang makasulod sa probinsiya kag indi maglapta ang ginakakugmatan nga coronavirus disease ukon COVID-19.
Ginpanindugan pa sang opisyal nga bisan mga residente sang Capiz, ang indi na mahimo makasulod magluwas lamang sa mga exempted kasubong sang mga empleyado sang gobyerno, medical staff, PNP, AFP kag iban nga law enforcement unit, trak nga naga-deliver sang mga pagkaon, bulong kag basic commodities.
Kinahanglan lamang nga magpresentar sila sang ID, health clearance/ declaration nga nagapamatood nga wala sila sang anuman nga ginabatyag nga kasubong sang sintomas sang COVID-19.
Indi man lipod sa ihibalo ni Gustilo nga may iban nga mga salawayon nga biyahero nga bangud indi sila makalusot sa border security checkpoint, nagapangita sila sang lakturan.
Apang nagpaandam ang opisyal nga sa tion madakpan sila nga nagalapas sa laye, magapangatubang sila sang panumbungon.
