Ginmanduan ni Police General Nicolas Torre III ang mga opisyal sang pulisya nga mangin madasig, nagaisa, kag moderno sa ila nga operasyon.
Sa iya labing-una nga command conference bilang pinuno sang Philippine National Police (PNP), ginmandu ni Torre ang gilayon nga pagpatuman kag pagpasangkad sang mga radio communication systems sa tanan nga istasyon sang pulisya sa bug-os nga pungsod.
Suno kay Torre, kinahanglan nga magpatigayon sang maid-id nga imbentaryo kag pagtsekyar sa kondisyon sang mga radyo kag iban pa nga importante nga kagamitan sang pulisya.
Nagplastar man ini sang hugot nga tatlo ka minutos nga response time para sa tanan nga yunit sang pulisya sa pagsabat sa mga emergency kag distress calls.
Dugang pa sang natungdan, ginganyat niya ang mga field commanders nga gamiton sang husto ang mga patrol vehicle agud mapataas ang presensya sang pulisya sa mga komunidad.
Agud masiguro nga maayo ang kahimtangan kag pagiging epektibo sang mga personnel, ginmandu man ni Torre ang hugot nga pagpatuman sang walo ka oras nga duty policy.
Bilang dugang, nagpanawagan si Torre para sa pag-angkon sang legal services para sa tanan nga pulis, indi lamang para sa mga isyu may kahilabtanan sa trabaho kundi mangin sa ila nga mga personal nga problema.
