MANILA, Philippines – Pagapasidunggan sang Philippine National Police “PNP”, ang isa ka police officer matapos napatay sa pagluwas sang duha ka miyembro sang Bantay Dagat nga gin-anod sang mabaskog nga ilog sang suba sa Cadiz City, Negros Occidental.
Ginkilala ang pulis nga si Police Master Sergeant Fernando P. Marfa, 40-anyos, 15 ka tuig sa PNP nga nagaserbi, kag katapo sang Cadiz City Police Station.
Suno sa report sang Police Regional Office-Negros Island Region “PRO-NIR”, natabu ang insidente alas 10:30 sang aga samtang nagapatrolya si Marfa kag mga katapo sang lokal nga Bantay Dagat sakay sa sakayan sa suba sa Brgy. Luna syudad sang Cadiz.
Dugang pa sa impormasyon, bangud sa mabaskog nga current sang tubig kag padayon nga pag-ulan, nag-umpisa na ang pagsulod sang tubig baha sa sakayan, samtang duha sa mga kaupdanan ni Marfa ang gin-anod, rason nga gintinguhaan niya nga isalbar ang mga ini, apang bangud sa mabaskog nga current, gin-anod man si Marfa sang mabaskog nga sulog sang tubig kag wala na makabalik sa sakayan.
Gindeklarar nga dead on arrival sa Cadiz District Hospital si Marfa kun sa diin base sa initial nga impormasyon asphyxia ukon kakulang sang oxygen bangud sa pagkalumos ang gintunaan sang iya kamatayon.
Sa karon ginpahayag ni PNP Public Information Chief Colonel Allen Rae Co nga luwas na ang duha ka miyembro sang Bantay Dagat kag nakabalik na sa ila pamilya, samtang nagpasalig naman ang National Police Commission “Napolcom”, nga magabulig sa pagproseso kag pagpagwa sang mga benepisyo, lakip ang iban pa nga assistance nga sakop sang commission’s mandate.
