Ginpasalig sang Police Regional Office 13 ang hugot kag padayon nga seguridad sa 66th Palarong Pambansa 2026 nga ginahiwat sa probinsya sang Agusan del Sur.
Sa interview sang Bombo Radyo kay Police Major Giovanni Tindoy, acting chief, police community affairs and development unit sang Agusan del Sur Police Provincial Office, iya ginpahayag nga aktibo kag fully deployd ang tanan nga police units sa billeting areas kag sporting event venues.
Suno kay Tindoy, 24/7 ang pag-duty sang mga pulis agud masiguro ang kaluwasan sang tanan nga delegado, atleta, opisyal, kag mangin ang mga tumalan-aw.
Pahayag pa niya, matalunsay kag matawhay ang una nga duha ka adlaw hinampang kag wala sang may narekord nga mga insidente nga may kaangtanan sa seguridad bangud sang ginpabaskog nga operasyon, crowd management, kag inter-agency coordination.
Nahibaluan nga magluwas sa PNP, nagabulig man sa seguridad ang Armed Forces of the Philippines, Bureau of Fire Protection, Agusan del Sur Provincial Security Unit, DRRMOs, LGUs, Barangay Peacekeeping Action Teams, kag mga civilian volunteers.
Nagpanawagan man ang natungdan sa publiko nga magpabilin nga alerto, magkooperar sa mga otoridad kag gilayon nga ireport ang bisan ano nga makaduluda nga mga hilikuton para sa padayon nga kahusay kag kaluwasan sa bug-os nga kahiwatan tubtob sa pagtapos sini sa Mayo 31, 2026.
