Ginatun-an sang Police Regional Office 6 ukon PRO-6 ang pagpatuman sang clear-bag policy sa mga eskwelahan sa Western Visayas bilang dugang nga seguridad kasunod sang mga insidente sang pagpangluthang sa sulod sang mga school campuses sa pungsod.
Sa interview sang Bombo Radyo kay Police Major Lailyn Sencil, spokesperson sang PRO-6, iya ginpahayag nga ginhatagan na sang mando ang mga provincial kag city director nga mag-coordinate sa Schools Division Office sang Department of Education ukon DepEd para mahibaluan ang ila inisyal nga assessment sa paggamit sang transparent bags.
Sa proposed measure, makita ang sulod sang bag sang mga estudyante kag school personnel agud mangin mas mahapos kag madasig ang pag-screen sa mga nagasulod sa school premises kag mapunggan ang pagsulod sang pusil, mga patalum kag iban pa nga ginadumilian nga mga bagay.
Suno kay Sencil, ang clear-bag policy indi lang ang solusyon sa school security kundi dugang lamang nga security measures bangud indi tanan nga eskwelahan ang may bastante nga mga security personnel nga maga-tsekyar sa mga estudyante nga nagasulod kag nagaguwa sa eskwelahan.
Nagapanawagan man ang natungdan sang koordinasyon sa mga eskwelahan kag ginikanan agud nga mapabilin ang kalinong kag katawhay kag malikawan ang anuman nga insidente nga mahimo magbutang sa kabuhi sang mga estudyante, manunudlo kag school personnel sa katalagman.
