Maga-deploy ang Police Regional Office 6 sang 1,911 ka mga personnel sa bilog nga Western Visayas bilang pagpanghanda sa Balik Eskwela 2026 sa Hunyo 8.
Sa interview sang Bombo Radyo kay Police Major Lailyn Sencil, Spokesperson sang Police Regional Office 6, iya ginpahayag nga sa amo nga numero ang ginakabug-usan sang 994 ka personnel gikan sa Philippine National Police, 40 ka mga personnel nagkalain-lain nga ahensya sang gobyerno, kag 877 ka force multipliers ang magabulig sa pagmintinar sang seguridad sa sulod kag guwa sang eskwelahan.
Suno kay Sencil, ang nasambit nga mga personnel nga igapahamtang sa mga eskwelahan, transport terminals, pedestrian lanes, kag iban pa nga lugar nga ginapaabot nga pagadugukan sang estudyante, ginikanan, kag publiko sa pagsugod sang klase.
Pahayag pa niya, magabutang man sang mga Police Assistance Desk sa tagsa sa rehiyon agud maghatag sang gilayon nga bulig sa tion sang emerhensya.
Nagpanawagan man ang natungdan sang kooperasyon sa tanan agud nga mangin malinong kag matawhay ang pagbukas sang klase.
