ROXAS CITY, CAPIZ- Nakaalerto na ang Police Regional Office 6 (PRO-6) bilang preparasyon sa pag-obserba sang Tigkalalag ukon Undas 2025 sa Western Visayas.
Sa interview sang Bombo Radyo kay Police Major Lailyn Sencil, Spokesperson sang Police Regional Office 6, iya ginpahayag nga yara sa kabug-usan 4,706 ka mga pulis ang iga-deploy sa bug-os nga rehiyon agud siguraduhon ang kaayusan kag seguridad sang publiko.
Kalakip sa mga ini ang mga katapo sang Aviation Security Unit 6, Regional Maritime Unit 6, Regional Highway Patrol Unit 6, Regional Intelligence Unit, 6th Special Action Battalion–Special Action Force, Regional Medical and Dental Unit 6, kag iban pa nga support units.
Pahayag nya, pagatutukan sang kapulisan ang pagbantay sa mga patyo, simbahan, transport terminals, kag iban pa nga mga lugar kun sa diin ginalauman ang pagdugok sang mga tawo.
Bilang kabahin sang tech-driven policing approach, pagagamiton sang PRO-6 ang mga drone kag CCTV cameras para sa mas maayos nga pagbantay kag sa mas madasig nga pagtumod sang ano man nga sahi sang insidente.
Nahibaluan nga sa kabug-usan, yara sa 287 ka mga Police Assistance Desks ang igapahamtang sa mga patyo, memorial parks, kag columbaria. Mangin kabulig sang pulisya ang 1,317 personnel nagikan sa Armed Forces of the Philippines (AFP), Bureau of Fire Protection (BFP), Philippine Coast Guard (PCG), kag iban pa nga partner agencies.
Nagapanawagan naman ang natungdan sa publiko sang kooperasyon kag disiplina agud masigurado ang malinong kag matawhay nga pagsug-alaw sang Tigkalalag 2025 sa rehiyon.
Interviewed by Bombo Francis Biñas
