Nagpatigayon sang serye sang operasyon kontra illegal fishing ang Police Regional Office 6 (PRO 6) sa Western Visayas nga nagresulta sa pagkadakop sang 25 ka mga suspek kag pagkumpiska sang kapin ₱1.3 milyon nga balor sang fishing equipment.
Sa interview sang Bombo Radyo kay Police Major Lailyn Sencil, spokesperson sang PRO 6, iya ginpahayag nga may yara sila sang maathag nga koordinasyon sang nagkalain-lain nga police units nga nakabulig sa madinalag-on nga implementasyon sang operasyon.
Suno kay Sencil, sa nasambit nga operasyon,may yara sang mga anti-illegal fishing operations ang natigayon nga nagresulta sa pagkumpiska sang mga fishing gear kag iban pa nga ginadumilian nga kagamitan nga may balor nga nagalab-ot sa P1,335,530.
Pahayag pa niya, ang kampanya ang may katuyoan nga maproteheran ang palangabuhian sang mga lehitimo nga mga manugpangisda nga nagadepende sa kadagatan.
Nagpahanumdom man ang natungdan nga likawan ang pag-engage sa iligal nga aktibidad agud mapabilin nga malinong ang palangabuhian kag malayo sa penalidad sang layi.
