Nakabalhag ang Police Regional Office 6 (PRO-6) sang kabug-usan nga 211 ka loose firearms sa Western Visayas sa nagkalain-lain nga operasyon nga ginpatigayon humalin Hulyo 1 tubtob Hulyo 15, bilang kabahin sang padayon nga kampanya batok sa ilegal nga armas-luthang.
Sa interview sang Bombo Radyo kay Police Major Lailyn Sencil, spokesperson sang Police Regional Office 6 , iya ginpahayag nga 228 ka operasyon ang gintigayon sa bug-os nga rehiyon nga nagresulta sa pagkaaresto sang 17 ka mga persona.
Suno kay Sencil, 16 ka armas-luthang ang nakumpiskar sa mga operasyon, 183 ka armas-luthang ang boluntaryo nga gin-surrender sang mga tag-iya, samtang 12 ka armas ang gin-deposito sa kapulisan para sa safekeeping.
Narekord man ang 30 ka explosive devices nga na-recover sa amo nga panahon.
Samtang, ang Iloilo Police Provincial Office (IPPO) ang may pinakadamo nga naitala nga aktibidad sa kampanya, nga may 100 ka operasyon, siyam ka persona nga naaresto, anum ka pusil nga nakumpiskar, 81 ka pusil nga boluntaryo nga gin-surrender, kag 11 ka explosive devices nga na-recover.
Dugang pa sang natungdan, padayon ang ila kampanya agud mapabakod ang seguridad kag mapunggan ang krimen sa Western Visayas.
