Nagpanguna ang Police Regional Office (PRO) 6 sa may pinakamadamo nga naaresto ngawanted persons sa bug-os nga pungsod Pilipinas.
Ini ang base sa opisyal nga datus sang Philippine National Police (PNP) humalin sang Agosto 1 tubtob Agosto 31.
Nahibaluan nga nakarekord sang 29.56% nga overall performance rating ang PRO6 nga amo ang pinakamataas nga porsyento sa kabug-usan.
Sa interview sang Bombo Radyo kay Police Major Lailyn Sencil,public information officer sang Police Regional Office (PRO) 6, iya ginpahayag nga 328 ka wanted persons ang naaresto sang kapulisan sa Western Visayas nga ginalakipan sang 73 ka Most Wanted Persons kag 255 ka iban nga mga Wanted Persons sa nagkalain-lain nga kaso.
Suno kay Sencil, ang nasambit nga numero ang narekord batok sa monthly operational target nga 1,110 nga kaso, rason sang pagpanguna sang PRO6 sa national performance ranking.
Suno naman kay Regional Director, Brigadier General Randulf Tuaño, ang pagpanguna sang PRO6 ang epekto sang padayon nga police operations, disiplina sa operasyon, kag padayon nga pagbulig sang mga pumuluyo sa Region 6.
Nagpanawagan man ang natungdan sang kooperasyon sa publiko nga padayon lang sa paghatag sang impormasyon nga makabulig sa pagtumod sang lokasyon sang mga pugante para sa malinong kag matawhay nga komunidad.
