ROXAS CITY – Ginkumpirmar ni board member Jonathan ‘Sonny’ Besa nga ‘back to zero’ ang pondo sang probinsya subong nga 2022.
Sa interview sang Bombo Radyo kay Besa, ginpahayag sini nga amu ini ang luyag ni Governor Fredenil ‘Oto’ Castro sang nagpatawag sang paghinun-anon kaupod ang mga department heads.
Buot silingon, nga pagaligwaton sang administrasyon ni Castro ang mga ginplano nga proyekto sang nagligad nga administrasyon bangud may yara ini sang prayoridad nga proyekto sa probinsya.
Suno pa kay Besa, pagaunahon sang Gobernador ang pag-imprubar sang serbisyo sa ospital, infrastructure kaangay sang farm to market road, financial assistance sa mga senior citizens kag scholarship sa mga estudyante kag poverty allocation.
Nahibaluan nga tubtob nalang sa Hulyo 8 ang ginhatag nga plaso ni Castro nga magsumiter sang budget proposal kag program activities, agud gilayon nga maaktuhan.
Ginapanan-aw man ni Besa nga sa bulan sang Agosto mapapasar na ang Annual Investment Plan (AIP) kag ang 2022 budget, kag sa Setyembre, ginalauman sini nga mapapasar man ang 2023 executive kag AIP budget.
