ROXAS CITY – Wala gin-aprubahan sang Sangguniang Panlalawigan ang request ni Capiz Governor Esteban Evan ‘Nonoy’ Contreras nga P17.5 milyon nga pondo para sa hazard pay sang mga empleyado sang gobyerno-probinsiyal kag special risk allowance (SRA) sang mga coronavirus disease (COVID-19) frontliners.
Ini ang ginkompirmar ni Board Member Jonathan Sonny Besa sang mainterview sang Bombo Radyo.
Suno kay Besa, wala ini gin-aprubahan matapos nakit-an sang konseho sa dokumento nga ginsumiter sa ila nga ang pagakuhaan sang gobyerno-probinsiyal sang pondo amo ang savings gikan sa personal services.
Panindugan ni Besa nga sandig sa Budget Circular/Memorandum, ang paghatag sang SRA kag hazard pay ang dapat kuhaon sa released Maintenance and Other Operating Expenses (MOOE).
Bangud diri, kinahanglan ini nga mahitsu kag mapaathag sa isa ka committee hearing nga ginpatawag ni Besa.
Suno kay Besa nga matapos ang committee hearing, gilayon sila nga magapatigayon sang special session agud maaprubahan ang nasambit nga request bangud nahangpan nila nga nagakadapat na ini nga mahatag sa mga empleyado sang gobyerno-probinsiyal.
Matandaan nga una na nga ginpahayag ni Provincial Budget Officer Antonio Arbis nga tanan nga casual kag regular nga empleyado sang gobyerno-probinsiyal nga nagtrabaho humalin sang bulan sang Marso 30 tubtob Abril 30 ang magabaton sang hazzard pay.
Suno kay Arbis nga P300 kada adlaw ang mabaton sang kwalipikado nga empleyado.
Gindugang pa sini nga ang mga nurses kag mga doctors nga naka-assign sa mga COVID-19 patients ang magabaton man sang special risk allowance.
