Ginbuyagyag ni House Deputy Speaker kag Antipolo City 1st District Representative Ronaldo Puno nga may nakatigana nga pondo sa gin-proponer nga 2026 National Expenditure Program (NEP) para sa mga proyekto nga imprastruktura nga ginapahayag tapos na.
Suno kay Puno, ini ang una nga nadiskubrehan ni Marikina City 1st District Rep. Marcelino Teodoro sa isa ka budget briefing, kun sa diin nagguha nga tanan sang flood control projects nga nakalista para sa iya nga distrito ang natapos na.
Magluwas diri, hugot nga ginsiling ni Puno nga ang pila ka mga nagapadayon nga flood control projects sa Antipolo kasubong sang sa Barangay Mayamot, Munting Dilao, kag Mambugan ang indi nahatagan sang pondo, samtang may mga bag-o nga proyekto nga ginapahayag indi kilala ang ginhalinan.
Ginsiling man sang kongresista nga halos tanan nga miyembro sang ila nga partido ang may kaparehas nga eksperyensya, kalakip na ang mga distrito nanday Presidente Ferdinand Marcos Jr. kag sang Majority Leader.
Bangud sini, nagpanawagan si Puno sang gilayon nga imbestigasyon agud mahibaluan kun sin-o ang may kahimuan sang ginaalegar iregularidad.
Natalana nga depensahan sang Department of Public Works and Highways (DPWH) ang ila nga proposed 2026 budget sa House Appropriations Committee sa maabot nga Martes.
