ROXAS CITY – Kapin sa 18,175,950.00 pesos nga pondo para sa igapatindog nga RT-PCR Laboratory sa probinsiya sang Capiz ang aprubado na sang Capiz Sangguniang Panlalawigan. Sa pagpanguna ni Vice Governor James ‘Mitang’ Magbanua, ginpasa sang Sangguniang Panlalawigan ang Appropriation Ordinance 100 nga naga-amend sa Appropriation Ordinance No.096 nga nagahatag sang dugang nga pondo para sa talatapan sang gobernador agud sa pagpatindog sang laboratory.
Base sa ordinansa, ginakilala sang Sanggunian ang importansiya sa pagpatindog sang naambit nga pasilidad nga maka angkon sang kaugalibgon nga RT-PCR Laboratory ang probinsiya sang Capiz para sa madasig nga pagpagwa sang resulta. Sa karon may yara gid lamang isa ka Laboratory nga nakatalana sa bilog nga Region 6 nga yara nahamtang sa Western Visayas Medical Center sa siyudad sang Iloilo.
Bangud sini nagalawig sang apat tubtub pito ka adlaw bag-o makuha ang resulta nga may dako nga epekto sa kampanya agudmatapna ang Covid-19 Virus sa bug-os nga probinsiya. Gikan naman ang pondo sa accumulated savings sang talatapan sang gobernador.
Nagasalig naman ang Sanggunian nga maga-abot ang containerized RT-PCR Laboratory sa sulod sang duha ka bulan nga pagadumalahan sang Roxas Memorial Provincial Hospital.
Samtang, pasado naman sa Capiz Sangguniang Panlalwigan ang Ordinance No.149 nga nagahalin sang pondo sang Mambusao District Hospital nga nagalab-ot sa 3,499,080 pesos.
Kapin sa 421,483.00 pesos ang nakatalana para Other General Services, 500,000.00 pesos naman para sa Drugs kag Medicine Expenses, samtang 2,577,597.00 pesos naman ang para sa Medical Dental and Laboratory Expenses.
Ang nasambit nga pondo ang gikan sa savings sang hospital sa travel expenses, trainings and seminars, water expenses, survey expenses, professional services, security services kag OMOE-health services.
Sa iban pa nga mga aktibidad, padayon naman nga nagpanghatag sang mga medical kit sa 50 ka mga pampubliko nga eskwelahan sa siyudad sang Roxas nga ginpangunahan ni Vice Governor Magbanua.
Ang nasambit nga aktibidad ang ginbuylugan ni BM Thea Faith Reyes. Ang nasambit nga aktibidad ang natigayon sa bulig ni anay Secretary Mar Roxas, Capiz 1st District Representative Tawi Billones kag dugang nga suporta nanday Laguna Congressman Dan Fernandez, Cavite Congressman Boyblue Abaya kag Mr. Alex Tan sang Island Shipping.
Nangin malipayon nman ang mga nakabaton sang mga medical kit sa ginpatigayon nga seremonya sa Plaridel West Elementary School.
Nakabaton naman sang bulig pinansiyal ang 19 ka mga benepisyaryo sang medical kag burial assistance gikan sa talatapan sang bise gobernador sa idalom sang Assistance to Individuals in Crisis Situation ukon AICS program.
Personal in inga ginpaabot ni Vice Governor Magbanua sa mga benepisyaryo gikan sa siyudad kag nagkalain-lain nga kabanwahanan sa probinisya sang Capiz. Bug-os naman ang pagpasalamat sang mga nakabaton sang bulig.
Samtang, nakabaton man sang bulig pinansiyal ang Barangay Bato, Barangay Guba kag Lawaan Integrated School gikan sa talatapan ni Vice Governor Magbanua.
