CAPIZ – Padayon ang imbestigasyon sang Contreras Administration natuhoy sa pondo nga gingamit sa motorpool sang probinsya sang nakaligad nga administrasyon.
Ini ang ginpahayag ni Provincial Administrator Dr. Edwin Chinel Monares sang mainterview sang Bombo Radyo.
Suno kay Monares nga may yara sang iregularidad sa pondo sang motorpool rason nga nagpatigayon sila sang imbestigasyon.
Ginpahayag sini nga nagalab-ot sa 4.7 milyones pesos nga fuel consumption sa motorpool ang ginasukot sa provincial government sa diin wala sila sang may nauyatan nga mga dokumento magluwas lamang sa mga resibo.
Magluwas diri, naubos naman ang pondo nga 4.8 milyones pesos para kuntani sa tuig 2019.
Mahibaluan nga madamo pa sang mga dealers kag suppliers sang spare parts ang wala nabayaran humalin sadtong tuig 2017 tubtob 2019 sa diin ginasukot sila sang minilyon pesos.
Bangud diri, luyag nga matul-id sang administrasyon ni Governor Esteban Evan “Nonoy” Contreras kaupod ang komite sang Internal Audit kun sa diin nagkadto ang minilyon nga pondo sang motorpool kag kun gingamit ini sang inskato.
Nagpasalig naman si Monares nga himuon nila ang tanan agud magguwa ang resulta sang ila ginpatigayon nga imbestigasyon.
Samtang, ginklaro naman ni Monares nga wala nila ginahingabot ang nakaligad nga administrasyon ni anay Governor Antonio Del Rosario bangud ginahimo lamang nila ang ila trabaho para sa mga pumuluyo.
