ROXAS CITY – Lusot na sa ginhiwat nga budget hearing, ang pondo sang probinsya para sa Fiscal Year 2024 kag 2025.
Sa interview sang Bombo Radyo kay Board Member Jonathan “Sonny” Besa Chairman sang Committee on Appropriations, ginpahayag sini nga ini ang labing una nga kahigayunan nga ginpatigayon ang budget hearing para sa duha ka tuig nga pondo.
Suno kay Besa, sa Annual Investment Program (AIP) para sa 2024 nga P2,341,839,884.00 kag P2,419,635,286.00 para sa 2025 madinalag-on nga nadepensahan sang 38 ka mga departamento ang ila ginhinyo nga mga pondo sang para sa ila tagsa ka mga operasyon.
Mahibaluan nga sa 2024 fiscal year budget masobra P493-M ukon 21.06% diri ang para sa General Public Services, masobra P173-M ukon 7.39% para sa Economics Services, masobra P918-M ukon 39.21% para sa Social Services kag para sa mga Other Purposes kaangay sang Aid to Barangay may yara sang pondo nga P473,000 ukon 0.02%, Terminal Leave Benefits nga P30-M ukon 1.25%, Gender And Development (GAD) nga masobra P1-M ukon 5.04%, Peace and Order and Public Safety (POPS) P5-M ukon 0.21%, MPBF P85-M ukon 3.63%, Dialysis Operations P10-M ukon 0.43%, Development Fund masobra P390-M ukon 16.69% kag Calamity Fund nga masobra P117-M ukon 5.04% sang kabilugan nga pondo..
Samtang, para naman sa fiscal year 2025 budget masobra P503-M ukon 20.81%, ang ginpa-in para General Public Services, sa Economics Services may yara sang masobra P176-M ukon 7.30%, Social Services masobra P944-M ukon 39.04% para sa Other Purposes kaangay sang Development Fund may yara sang masobra P4-M ukon 17.28%, Calamity Fund masobra P1-M ukon 5.19%, Aid to Barangay nga may masobra P400,000 ukon 0.02%, Terminal Leave Benefits P35-M ukon 1.45%, Gender And Development (GAD) masobra P125-M ukon 5.19%, Peace and Order and Public Safety (POPS) P5-M ukon 0.21% kag MPBF P85-M ukon 3.51%.
Nagalaum man si Besa nga matapos sini ang committee report sang fiscal year 2024 subong nga Nobyembre 21 agud maplastar kag malakip sa ila pagatalakayon sa ila masunod nga session kag sa Disyembre 5 naman para sa fiscal year 2025.
Pagsiguro ni Besa nga antes magtakop ang 2023, maaprubahan na ang budget para sa 2024 kag 2025 sang Sangguniang Panlalawigan.
