ROXAS CITY – Ginpahayag ni Pontevedra Mayor Esteban ‘Dodoy’ Contreras nga indi puwede dalahigon ang tanan nga miyembro sang ila pamilya sa sala sang isa nila ka himata.
Ini ang ginpahayag sang alkalde sang mainterview sang Bombo Radyo, angut sa isyu nga ginakaimbulbaran sang iya apo nga si EJ Contreras nga ginaalegar nagpanghimulos sang lady rider/looper nga taga Metro Manila.
Ginpaanggid ni Contreras sa isa ka hambalanon nga “ang sala ni Juan, indi puwede mapaako kay Pedro.”
Matuod suno diri ang hulubaton nga ‘kun ano ang puno amu man ang bunga’ kaangay nga ‘ang mangga, ang bunga niya mangga man’ apang indi tanan nga bunga sang mangga alalangay, may yara suno diri sang magagmay, dalagko, mapait, maaslom ukon matam-is.
Pagpunto ni Contreras nga wala nila ginatolerar ang iya apo, kun may nahimo gid man ini nga sala sa layi, ginapasiguro sini nga indi magamit ang ila puder sa gobyerno agud mapasabat ang 26-anyos nga apo.
Ginkumpirmar man sang alkalde kag bilang doktor nga sandig sa resulta sang medical examination nga ginpatigayon sa 37-anyos nga lady rider/looper kag pharmacist by profession, nagaguwa nga may laceration ang pribado nga parte sang lawas sang babayi.
Dugang pa sini nga gin-aku sang iya pamilyado nga apo nga may relasyon sila sang amu nga lady looper, rason nga yara ang babayi sa iya lugar, apang ginpanginwala nga may pagpanghimulos nga natabo.
Apang, suno diri, nasumiter na sa korte ang tanan nga dokumento, gani bahala na ang korte nga maghusga kag magdesisyon kun may kamatuoran ukon wala ang napasaka nga kaso nga pagpanghimulos batuk sa iya apo.
Ginklaro man sini nga wala nila ginatago ukon nagapanago si EJ, suno diri, na-file na ang kaso gani magahulat nalang ini sang mangin desisyon sang hukuman.
Ginpasalig sang anay gobernador nga ang hustisya para sa tanan, manggaranon man ukon imol.
